A primeira onda do Estudo Xeral de Medios en 2017 sitúa á Radio Galega coma a segunda emisora que máis medra en Galicia, ademais da COPE. A canle pública sumou 20.000 seguidores con respecto á última medición, publicada en decembro, o que supón un incremento de audiencia do 14,5 por cento, de luns a venres.
Con estes datos, a Radio Galega pasa a ser a terceira sintonía máis escoitada en Galicia, superando a Onda Cero, con 158.000 oíntes nos días de semana.
As cifras confirman así mesmo que este crecemento foi continuado ao longo do ano xa que, con respecto á primeira medición de 2016, o incremento de oíntes alcanza o 27,4 por cento, tomando tamén como referencia o período de luns a venres.
A audiencia tamén respalda a programación da Radio Galega Música que duplicou o número de oíntes en relación coa anterior onda do EXM. A canle sumou 8.000 novos seguidores e pasa a ser a emisora musical de referencia para 16.000 persoas de luns a venres.
